唔知道你哋有無試過？但我就試過一兩次好趕嘅情況吓，無曬烘培紙 Parchment Paper，就用蠟紙 Wax Paper代替。結果好慘烈，除咗個張紙一係溶咗，或者食材痴住唔甩，浪費咗啲食材，又要從頭嚟過。
咁究竟兩者嘅分別喺邊？同埋點樣用呢？就同大家講解吓啦～
Parchment Paper / Baking Paper / Cooking Paper / Bakery Paper
烤盤紙 / 牛油紙 / 煮食紙 / 烘培紙
其實都係一樣由漂白後（白色）無漂白（咖啡色）嘅紙，經過化學處理，用硫酸或者氯化鋅等等浸泡後，吹乾，再加上Silicon 矽膠塗層（每個生產商用嘅處理方法唔一定一樣哦）。所以佢耐熱性高 （攝氏 232度），而且唔會痴住啲食物。所以佢嘅用途好廣泛。例如烘培，煮食，包裝，做唧袋等等。
Wax Paper / Waxed Paper
同樣都係蠟紙，佢都係有一層塗層喺紙張上面，只不過係一層蠟，一般會有大豆蠟或者石蠟。由於蠟嘅熔點低（攝氏42-68度），如果將呢張紙放入焗爐，有可能會起火。所以比較適合低溫甚至可以話凍嘅用途，例如用兩張夾住用嚟壓平啲曲奇，批底，包裝糖果，包裝三文治，或者用嚟放檯面搓麵包用，唔會痴之餘，仲方便清潔（雖然好唔環保，不過開餐廳為咗快同衛生，都會咁樣做）。咁點解包裝上面寫住可以喺微波爐用啊？因為佢嘅用途係蓋住你要叮嘢嘅碗，等啲汁唔會爆到成個微波爐都係咯～
蠟紙質地有啲黏黏哋，“令”身，好薄。
焗爐紙質地一般好爽，好滑，唔同生產商做出嚟厚度，顏色，質感未必一樣。
雖然焗爐紙係可以循環使用達三次。但呢兩款紙係香港都未能夠回收。咁如果想環保啲，唔洗用一次或者幾次就掉咗佢可以點呢？又可以有乜嘢選擇呢？
有有有，可以用矽膠墊或者不沾布咯～
食用矽膠墊，有啲係加咗玻璃纖維或者尼龍網製造。傳熱能力高，一般耐高溫達 250度。因爲佢嘅耐熱性高，除咗放焗盤上面，好多時用嚟做熱糖，放涼熱糖，或者焦糖脆脆呢啲高溫嘅食材。
不沾布又名油布或者高溫布，佢當然唔係一塊布啦，但就係可以重複使用嘅烘培紙，由玻璃纖維製造，加上 Teflon 或者矽膠塗層。一般耐熱範圍為攝氏70-260度。不過如果你想好似用焗爐紙咁圍個蛋糕模，就需要剪裁張不沾布，咁佢就會係呢個蛋糕模專屬嘅不沾布啦。
點樣用焗爐紙整唧袋
想第一時間睇到更多食譜，記得 Like 我個 Facebook Page 同 Instagram 啦～
Instagram: https://www.instagram.com/back2basicsss/
Comments