夏天特別想食涼浸浸嘅嘢～所以最近整好多唔同嘅果凍，有實淨嘅果凍，有啲飲用嘅啫喱飲品！今日見屋企好多3合1奶茶，所以就試下整呢個！
蒟蒻粉係需要加凍水攪拌均勻，加熱至 80度先至用嘅。我試咗兩次，第二次出嚟嘅效果比較好睇。
按照奶茶包裝上面係1包奶茶+150mL水。
所以第一次，我就用咗100mL 水去開個蒟蒻粉，然後用 50mL 熱水攪溶奶茶，之後將兩個 mix 埋就入模。不過出到嚟，雖然蒟蒻粉都已經溶曬，但係好多透明點點。
所以第二次，我用左 120mL水煮開個蒟蒻粉，之後用 30mL 熱水開奶茶，再撞埋一齊，倒入模等攤凍就放雪櫃雪。今次少咗啲透明粒粒。不過只需要幾分鐘就可以整到嘅奶茶果凍，個人認為 OK 啦～
奶茶凍
材料：
奶茶 1包
蒟蒻粉 12克
室溫水 120mL
熱水 30mL
將蒟蒻粉加入煲內，再加室溫水，攪拌均勻後開火煮至 80度。
煮緊嘅同時，將奶茶加熱水攪溶。
當蒟蒻溶液到溫度嘅時候，撞埋落去啲奶茶度，攪勻。
倒入容器度，放涼，之後放雪櫃雪 30-60分鐘就食得啦～
コメント