朱古力淋面

好多時見到唔同顏色嘅淋面蛋糕真係好靚，又“令”又多顏色。其實朱古力淋面唔難做，我哋先拆解最簡單嘅咖啡色朱古力淋面啦！

會用到淋面嘅一般都係 mousse cake, 因為 mousse cake 一雪完，脫模其實蛋糕面同埋周邊都已經好滑（相比起忌廉蛋糕），淋面就會好 perfect 包圍成個蛋糕了～

做淋面，最緊要練習掌握需要份量，同埋淋面嘅濃稠度。如果淋面溫度低，比較“杰“身，淋出嚟就唔會夠滑，而且會結一塊塊，個邊又唔夠平滑。（好似下面第一張同第二張相咁樣）。

相反，如果太熱，太稀嘅話有可能會溶咗個蛋糕本身，或者淋完上去會源住個邊流翻曬落嚟，個面就遮蓋唔到㗎啦。所以第一次淋嘅話，建議你可以攞一個無腳嘅碗反轉練習，練習完就可以溶返個淋面淋落蛋糕度啦。

第一個蛋糕旁邊唔夠平滑，而第二個蛋糕就會見到凹凸不平，你為蛋糕本身收邊唔靚，淋落去就唔流線型了。

6“ 朱古力淋面材料：

淡忌廉 96克

清水 116克

砂糖 144克

可可粉 48克

魚膠粉 10 克

1. 可可粉過篩，魚膠粉用以上清水嘅少部分浸泡 5-10分鐘。

2. 水，忌廉，糖煮至 121度，需不時攪拌。

3. 關火，將可可粉加入，攪拌至完全融入液體裡面。

4. 將少量可可溶液倒入魚膠溶液裡面拌至完全溶化。

5. 將魚膠倒回整體可可溶液內。攪拌均勻。

6. 過篩，放涼至約 24度即可淋面。

備註：此淋面可以放雪櫃 2 星期。

魚膠粉同魚膠片用邊樣先好？點樣換算魚膠片對魚膠粉？入嚟睇睇啦：https://bit.ly/3a8mCbk

1. 倒淋面前，蛋糕脫模後，再放-18度冰箱雪約 30分鐘再取出淋面，效果更佳。

2. 蛋糕用一個比佢細嘅器皿托起，淋面就可以均勻地流到蛋糕圓周底部。下面用托盤承住。（如有需要可以攞返托盤嘅淋面液再用）。

3. 淋面時由中心開始倒，等淋面液自己瀉開。

4. 之後就開始圍住個邊去淋。確保全部都沾上淋面液。

5. 當淋面唔再滴嘅時候就可以收邊，放係你需要蛋糕墊上面。然後可以繼續裝飾了。

想第一時間睇到更多更新，記得 Like 我個 Facebook Page 同 Instagram 啦～

Recent Posts