兩個都係叫忌廉，咁應該一個係無落糖，一個落咗糖先叫咗甜忌廉遮～
其實甜忌廉並唔係加咗糖嘅淡忌廉。雖然兩個嘅中文名都有忌廉呢個字，但其實如果英文名就會有好大嘅分別。
淡忌廉 – 係叫 whipping cream， 係乳製品。好耐之前，cream係將牛奶放一段長時間，水油分離後，將上面嘅油脂攞出嚟，就係 cream。但依家工業化之後，牛奶渣咗出嚟之後，啲牛奶就會攞去機器度 spin, 將脂肪，同牛奶分開。然後，就按住比例去調配唔同嘅忌廉，同埋牛奶啦～所以好多牛奶都係叫做 “milk drink” 牛奶飲品，因為後加工將脂肪放返入去。如果想飲真嘢，就買啲唔係叫做 Milk Drink / Fresh Milk 嘅牛奶啦～
淡忌廉保存方法：
- 打起咗可以放 3-4 日喺雪櫃
- 開口後，可放 5-7日
- 不建議放冰箱，因為極大可能水油分離。
- 冷藏過嘅淡忌廉會有打唔起嘅機會，可用嚟煮飯。
甜忌廉 – 係叫 Pastry Topping，好似咖啡伴侶咁，係極少牛奶嘅成分。打發性高，容易定型，除非遇到高溫，否則唧出嚟嘅花好少變形。
一般甜忌廉直接倒出嚟嘅口感有啲油膩，食港式甜品嘅時候一般會食到。打發後嘅甜忌廉口感比較實在，又會無咁油膩嘅感覺。
甜忌廉保存方法：
- 打起咗可以放 5 日喺雪櫃
- 可冷藏，但溶雪後不能再放冰櫃。
- 開封並解凍後，可放雪櫃 7 日。未開封可放雪櫃14天。