由於五，六年班嘅時候比老豆嘅女朋友 bully 我，當住一臺食緊飯嘅人（佢屋企人）話我肥，自此之後，我就對我自己嘅身形諸多挑剔。當時都已經唔理發育，高唔高，靚唔靚，我只係知道我唔可以肥！所以我好少食炸嘢，因為 no excuse，食少少都係油。
自此之後，基本上我一年食唔到20次炸嘅食物，肥嘅肉，雞翼，薯片呢啲我都係好抗拒。好在，用咗好幾年時間，先懂得點樣去接受自己嘅身型，肥同瘦都唔係重點，最緊要健康同埋食嘢適中，唔好偏食，唔好連續食同樣嘅食物。
自己30幾歲先至因為同啲釣友釣完魚食飯，次次都有 70%係食炸物，所以我先對炸嘅食物開始接受多咗。因為咁，對我煮嘢食嘅領域亦都曠闊咗。雖然都係唔炸我嘅主食，但我都會加啲啲炸過嘅 elements 入去我嘅食物裡面。其中令我無法抗拒嘅，就係炸蒜同埋蒜油！
尤其係泰國面食，都會放兩者其中一個，或者兩樣都放。的確係將無特別嘅菜色變得更豐富嘅～ 除左泰國菜，其實炒飯，炒牛肉，炒菜，拉麵放少少炸蒜/蒜油都係會提升個餸添。
炸蒜其實好簡單，但係要好有耐性。重點係一路細火炸，一路搞住佢等佢唔好痴底同埋炸燶啲蒜變苦。
成個炸蒜嘅過程需要 12分鐘時間，因為我用 processor 打碎啲蒜，所以會細粒啲啲，如果用手切嘅話大粒啲，可能要炸耐少少。
同埋記得變得微微金黃色，就差唔多要熄火過篩㗎啦，因為個啲熱力其實係起鑊之後都會繼續煮嗰啲蒜，變得更金黃架。
尾三嗰張相去到倒出黎其實 30 秒架咋，所以要望到實，差唔多就要撈起㗎啦～
炸定啲蒜，蒜油可以放雪櫃，蒜蓉就可以用密封瓶裝住，隨手就可以攞黎用啦～
想第一時間睇到更多更新，記得 Like 我個 Facebook Page 同 Instagram 啦～
網頁: https://www.goingback2basics.com/
Instagram: https://www.instagram.com/back2basicsss/
Comments