玻璃樽消毒

玻璃樽用途多，又環保，不過每次再用嘅話，除咗洗乾淨之外，最好都係消毒吓個樽，放嘢入去先至唔容易壞。特別係要醃製食物，對容器要求更嚴謹。以下係幾個唔同嘅方法用嚟消毒玻璃樽，大家可以參考吓～

切記：

· 玻璃樽必須要洗乾淨，無油，無污糟先至進行消毒

· 玻璃樽熱嘅時候唔好放凍嘢落去，或者好凍嘅樽放熱嘢，唔係好易爆開，好危險架！

最快捷嘅方法：

· 食用酒精 – 大家最好用食用級嘅酒精，雖然會揮發走，但呢個方法係最唔怕殘留物會影響身體

· 微波爐 - 將玻璃樽淋濕，放入微波爐，高火叮 45秒，取出攤涼

時間長少少嘅方法：

· 水煮 - 準備一個大煲，放滿室溫水，將玻璃樽同蓋放入水中，加熱滾起後，轉細火滾10分鐘，用工具取出，倒轉放喺放涼架上攤涼，蓋就用廚房紙印乾。

· 蒸 - 有蒸焗爐嘅，可以洗乾淨後放入蒸焗爐裡面用攝氏100度蒸 20 分鐘。

· 焗爐 - 凍焗爐時將玻璃樽放入去，加溫至130度，達 130度後焗 20分鐘。

放涼架

一般放涼架去放涼一啲大口嘅玻璃樽係一定無問題但如果要放一啲高身樽嘅話，我會用呢款 ikea 可以買到嘅晾碗碟架，平時我用嚟分隔平底鑊，依家就可以攞嚟晾熱樽啦。

另外有時候返用之前放醬料嘅蓋，有時候會有好大陣味，可以用蘇打粉開水浸泡，再吹到無味。但有時味道太強烈嘅，你唔想用，又配唔到個蓋，就可以用蜜蠟包裝或者用矽膠蓋。

想第一時間睇到更多更新，記得 Like 我個 Facebook Page 同 Instagram 啦～

Recent Posts