被老公封為盆栽殺手嘅我，除左嗰啲真係好粗生嘅植物之外，成日想種嘅香草結果都係比我幫佢滅種。留得生口嘅有老公同事送比我嘅種不死（唔知佢叫乜名嘅植物），兩種唔同嘅左手香，同一盆薄荷。成日見呢幾盆嘢種極都有，實在令我滿足感倍增！可能因為我已經認定佢自己會照顧好自己，所以我好放心佢種，由得佢自己生長。
可惜我自己最想種嘅，永遠都係唔到幾個月就會揮手同我講 Bye Bye。趁依家春天步入夏天，我即管再試吓。買左新鮮嘅種子，開始種。跟種子黎嘅包裝，有說明種子會幾時發芽，幾時成熟。今次，我決定耐心去等佢。
左手邊第一盆就係我個種不死，中間同右邊係唔同種嘅左手香
回想起之前所有種死嘅植物，多數都係我最在意最想要或最想用嘅植物（如香草），好多時，我太過在意佢嘅 well being，成日搞佢，成日 test 佢夠唔夠水，覺得唔夠就會淋水。有啲係唔洗淋太多水嘅話，我有可能真係等太耐都唔比水佢飲，但又比太多太陽佢曬。永遠都無可能見到佢健健康康咁成長。
原來我呢個個性都令到我半生人都好懊惱，太心急，太在意，往往令到我自己精神緊張，自己個腦裡面好似好多幻想咁樣，越多想像力，最終令自己有好多嘅失望，包括對自己，對工作，對關係。
呢一年嘅休息，有充分嘅時間比我去 experience life，頓覺之前嘅幾十年，好似一隻盲頭烏蠅咁，周圍飛，周圍鐘，對腳著陸嘅時間無幾多，又飛走，無咩 purpose，無特別成就感，亦無咩從心而來嘅喜樂。
望住剛播種嘅植物，唔夠兩三日就開始發芽。我成日望住佢，覺得好滿足。原來我提供到適當嘅環境，適當嘅時候佢就會發芽，成長，到熟成，到收割。
感恩無工作嘅呢段時間令我慢下來，悟到原來人生都好似種植咁，只需要順其自然。唔係所有嘢都要我自己親手去 intervene，記住所有嘢都有自己嘅 timing。如果對身邊嘅人與事，睇得太重，太緊張，太多灌溉，太多關注，只會壞事。所有事情都必須要恰到好處嘅關心，不多不少，就算結果不如人意，但換個角度睇都未必係一件壞事。人生如此，工作如此，關係亦如此。
Commentaires