尋日見到超市嘅蘆筍真係好平， $10一扎大概4-6條蘆筍，即刻買左返屋企準備今日煮 Brunch 食。
以前我唔識揀蘆筍，成日買得貴，仲要多數都好老。所以我之後只會等到蘆筍好平又好多既時候先買，所謂不時不食，咁多既時候，應該都係當做既時候。
處理蘆筍：
首先將蘆筍包裝拆開之後，逐條逐條一隻手揸住個尾一隻手揸住中間部分向外拗，斷開嘅上半截，就係無渣，又爽脆嘅部份啦。如果斷開嘅尾部好長嘅話，即係條蘆筍好老，如果個尾短的話，就代表個蘆筍好新鮮，唔老。
材料：
蒜蓉 3粒
蘆筍 8-10條
橄欖油 少許
鹽 ¼茶匙
黑胡椒粉 少許
做法：
1. 將蘆筍洗乾淨，稍稍整乾佢，放入容器內。
2. 放蒜蓉入去，加鹽，橄欖油，將佢拌勻，最快嘅方法就係用手一條一條搽上去。
3. 預熱平底鑊，(我今次用 Staub 嘅 Grill pan) 跟住將蘆筍放上去等兩分半鐘，等佢煎完一面，反轉佢煎另外一邊，都係約兩分半鐘。
4. 之後倒大約三湯匙水入鑊裡面。D水份一遇到個熱鑊就會大量水蒸氣，所以一定要好小心。呢個方法會將個蘆筍半蒸熟，又加返d水份。
5. 一分鐘之後，就可以試下係唔係你鍾意嘅硬度，呢個狀態應該係脆身，我最鍾意嘅口感。
6. 熄火上碟就搞掂了～
今次我有整埋個 Hollandaise Sauce 一齊食，但其實加左蒜蓉都已經好夠味啦！
Comments