今日食物中午飯雖然好飽，但係好想食啲甜嘢，屋企仲有一包泰式奶茶，咁就不如整個奶蓋蛋糕啦～ 衝衝忙忙，就緊係出錯啦～ 我將個蛋糕份量計錯咗，所以個蛋糕出嚟好薄，最後唯有將個蛋糕切出嚟，疊高佢去唧奶蓋，所以呢個咁卡哇伊嘅蛋糕就誕生咗啦～
一整好嘅時候，老公迫不及待食，因為未雪夠嘅關係，個芝士奶蓋係有啲鹹同酸嘅，不過晚飯後嗰件，雪完就變得剛剛好！茶味多數係芝士味之後出嚟，同平時飲芝士奶蓋飲品一樣哦～
因為一定會有人唔鍾意呢啲鹹同酸嘅配搭，所以我都有一個無芝士嘅泰式奶茶奶蓋食譜，兩款奶蓋隨心情改變咯～
蛋糕材料：
蛋黃 40 克
砂糖1 13克
泰式紅茶 5克
熱水 50克
低筋麵粉 33克
蛋白 60克
砂糖2 33克
菜油 20克
做法：
1. 將茶葉放入茶葉袋裡面，倒入熱水浸泡至變涼。（因為泰國茶好多茶碎，唔放入袋裡面會有好多渣）放涼後，將菜油加入。
2. 預熱焗爐 上下火 170度 / 對流風 150度。
3. 準備4吋戚風蛋糕模。
4. 麵粉過篩備用。2個雞蛋分開蛋黃放細碗，蛋白放大碗。
5. 將蛋白打發後，分三次加入砂糖，中間一直打發至蛋白企身（乾性發泡 – 打蛋器拉起蛋白時，拉出來勾係企身嘅）。
6. 用同一個打蛋器打發蛋黃：蛋黃加入砂糖，打至變淺黃色，體積大一倍左右。
7. 將已過篩麵粉加入，拌勻。
8. 取 1/3蛋白，放入蛋黃麵糊裡面攪拌均勻。再將麵糊倒回蛋白裡面，輕輕拌勻，拌勻即停，否則會消泡。
9. 再取出少量麵糊加入紅茶/油裡面，拌至完全無油水分離，加回麵糊當中。
10. 再輕輕拌勻，倒入蛋糕模裡面焗 20-25分鐘，或至插入針後無蛋糕粒拉出嚟。
11. 出爐之後將蛋糕模倒轉放涼，蛋糕就唔會回縮了。
芝士奶蓋：
泰式紅茶葉 8克
蛋黃 1個
砂糖 10克
忌廉芝士 100克
糖霜 10克
淡忌廉 70克
煉奶 10克
1. 將茶葉放入茶葉袋裡面，倒入熱牛奶。或者兩者一齊放入微波爐叮2分鐘。浸泡 15分鐘。
2. 忌廉芝士放至室溫。
3. 糖霜過篩。放入忌廉芝士打至無粒粒。
4. 碗內將蛋黃，砂糖攪拌均勻。
5. 將奶茶放入煲內，加熱至周圍起泡泡。即刻倒入蛋黃裡面。一直倒一直攪拌，以免雞蛋會煮熟或者起粒。
6. 將 5. 嘅內容倒返入煲內，用細火加熱，一路攪拌一路加熱，直到放一個羹入去可以沾住雞蛋牛奶混合物 (coat the spoon).
7. 將 6. 嘅內容過篩，倒入忌廉芝士內。
8. 攪拌均勻後，加入煉奶，攪勻，再加入淡忌廉。攪勻。然後放入唧袋內，入雪櫃雪至蛋糕完全放涼。
9. 蛋糕放涼後小心脫模，放碟上。中間部份用刀挖一個小窿。
10. 將芝士奶蓋唧袋剪開，由中間個窿開始唧奶蓋，唧然後慢慢延伸至蛋糕周邊，等個奶蓋滴落就夠啦～
11. 加幾片九層塔葉做裝飾，放入雪櫃雪大概1小時即可享用。（九層塔可以一齊食，會更有風味。）
如果唔鍾意食到芝士奶蓋嘅鹹鹹哋酸酸哋嘅味道，可以用奶蓋代替。
泰式奶蓋：
牛奶 50克
泰式紅茶葉 8克
蛋黃 1個
砂糖 10克
淡忌廉1 100克
淡忌廉2 70克
煉奶 20克
1. 將茶葉放入茶葉袋裡面，倒入熱牛奶。或者兩者一齊放入微波爐叮2分鐘。浸泡 15分鐘。
2. 淡忌廉 1 打至 7 成。 （想知道乜嘢係七成可以 click 呢度睇吓：https://bit.ly/2TOgz4I）
3. 碗內將蛋黃，砂糖攪拌均勻。
4. 將奶茶放入煲內，加熱至周圍起泡泡。即刻倒入蛋黃裡面。一直倒一直攪拌，以免雞蛋會煮熟或者起粒。
5. 將 5. 嘅內容倒返入煲內，用細火加熱，一路攪拌一路加熱，直到放一個羹入去可以沾住雞蛋牛奶混合物 (coat the spoon).
6. 放涼後，加入煉奶，攪拌均勻後加入 70克淡忌廉，拌勻。
7. 最後加入已經打發嘅淡忌廉，拌勻後倒入唧袋內放雪櫃至蛋糕放涼。
8. 蛋糕放涼後小心脫模，放碟上。中間部份用刀挖一個小窿。
9. 將芝士奶蓋唧袋剪開，由中間個窿開始唧奶蓋，唧然後慢慢延伸至蛋糕周邊，等個奶蓋滴落就夠啦～
10. 放入雪櫃雪大概1小時即可享用。
想第一時間睇到更多更新，記得 Like 我個 Facebook Page 同 Instagram 啦～
網頁: www.goingback2basics.com/ Facebook： www.fb.com/goinbacktobasics/ Instagram: www.ig.com/back2basicsss/
Youtube: https://bit.ly/2ZK6MyR
コメント