蒜香黃金薯仔粒

我真係好鍾意食薯仔，煎薯餅，炒土豆絲，炆咖哩薯仔，炸薯條，焗薯，薯蓉，蕃薯等等等等，可能食得多，老公都會笑我係蕃薯！

以前都會亂買薯仔黎煮。亂買，即係淨係買最平既。但原來係唔得架！整薯蓉又唔夠厚，整焗薯又唔夠軟熟。所以開始上網做好多 research, 係啊，research 薯仔既特性，同埋煮法。終於都有少少結論同心得。

香港一般超市雖然無外國咁多薯仔款色買，但其實都已經涵蓋好多唔同特質用黎煮野食！我地一般買到大陸薯仔，美國焗薯，澳洲新薯，澳洲紅皮薯仔等等。

除左價錢分別之外，佢地都有好大分別架～

美國焗薯 －澱粉高 －鬆軟 – 適合炸，焗，蓉

澳洲紅皮薯仔 － 澱粉低 － 滑，creamy， 濕潤 － 適合煮，焗，蓉

新薯 － 澱粉中 －滑，creamy， 濕潤 － 適合蒸，煮，焗

大陸薯仔 － 澱粉中 －少少鬆軟濃稠，creamy － 適合炸，焗，蒸，蓉，煮，炒

所以呢我今次介紹比大家既焗蒜香黃金薯仔粒，我會用澳洲紅皮薯仔，因為佢皮薄，但濕潤，所以焗完外面會脆皮，裡面就好鬆軟。鍾意食薯條但又怕炸野肥，可以考慮煮呢個！

材料

紅皮薯仔 1磅，切成 1.5cm 粒粒

牛油 1 湯匙

蒜 4粒，切蓉

醬料

蛋黃醬 ½杯

白酒醋 1 湯匙

乳酪 1湯匙

紅椒粉 1.5茶匙

糖 1茶匙

乾蔥 1粒，切細粒

做法

1. 煮一大鍋水，加入3湯匙鹽，將切好薯仔放入，煮6分鐘，瀝乾水。（加入3湯匙鹽會將薯仔皮更加脆架～）

2. 焗爐預熱 232度。

3. 將薯仔倒入焗盤上，灑上鹽，黑椒粉，蒜蓉調味。之後加入牛油溶液，拌勻。

4. 焗40-45分鐘，中間要將d薯仔翻面。

5. 等緊既時候，將醬料全部伴埋一齊。如果你想辣既話，加d辣椒粉會更加好味～

6. 出爐放幾分鐘先好食啊，因為裡面d蒸汽會好熱架！