酸豆角肉末

十幾年前，喺深圳幫我爸爸手，中午飯我特別鍾意食一個飯盒，我記得我呢個已經係一個上等嘅飯盒，7蚊人民幣。同事話怕我水土不服，所以無買 4蚊飯盒俾我食。佢哋真係好sweet！而佢哋揀比我嘅飯盒，就變成我其中一個 favorite 飯盒了！

不過其實一路都唔知道嗰個飯盒係乜嘢。只係知道有豆同埋肉，仲有辣椒。十幾年過去，有一次見到呢個餸菜，先知道叫做酸豆角肉末，忽然間好想食，周圍搵呢個酸豆角，但周圍都無得賣。竟然有一日俾我係網上面見到個食譜。今日去買餸即刻買材料去整啦～

材料：

青豆角 5cm直徑1札

辣椒 2-4條

花椒 1茶匙

紅蘿蔔半條

蒜頭 2粒

水容器容量

鹽水份 3%

做法：

1. 準備一個高身大口嘅玻璃樽。將玻璃樽消毒（玻璃樽消毒：https://bit.ly/2FOsag4）

2. 青豆角洗乾淨，晾乾後，將頭尾切走之後將佢切成你喜愛嘅大細。

3. 紅蘿蔔長邊切片成長條型，用嚟壓住個樽頂之餘，提供發酵所需要嘅糖份。

4. 容器放磅上面，倒入凍滾水/過濾水，再將水量重量 x 0.03 重量嘅鹽分加入並攪勻。倒落另外一個乾淨嘅容器裡面備用。

5. 將1/3青豆角放入樽內，加入一半花椒，1粒蒜頭，一半辣椒。再加入1/3青豆角，再鋪上剩餘嘅辣椒蒜頭。最後倒入剩餘青豆角，將紅蘿蔔片放喺頂部，將所有青豆角壓實。

6. 倒入剛剛預備好嘅鹽水到頂部，封上蓋，放喺陰涼地方約 7 日。最好唔好搖個樽，唔係啲氣壓好易逼咗啲水出嚟架。

7. 7日之後就可以放入雪櫃停止/減少發酵。而且就可以煮嚟食啦。（如果裡面啲水有少少白色係正常嘅反應嚟嘅）。

我用咗新豬肉嚟整我個酸豆角肉末，係比較清淡嘅版本，因為正宗嘅一般都係好油同好鹹。因為老公唔食呢個餸所以呢度係一人份量。

材料：

新豬肉 100克

酸豆角 4-6湯匙

醬油 ½茶匙

砂糖 ½茶匙

蒜蓉 1茶匙

花椒粉 ½茶匙

麻辣椒油 1茶匙

做法：

1. 新豬肉加入醬油，砂糖稍微醃一下。

2. 平底鑊掃少少油，加入蒜蓉，有香味嘅時候，就可以加入新豬肉炒1分鐘，

3. 加入酸豆角，花椒粉再炒多 3 分鐘。最後加入麻辣椒油兜勻就可以上碟了。

想第一時間睇到更多更新，記得 Like 我個 Facebook Page 同 Instagram 啦～

Recent Posts