焗豬扒飯，細個嘅時候一日裡面整咗兩次，算係好有heart去整，全因為我好鍾意張耀揚，佢嗰套白玫瑰裡面張曼玉都唔知整咗幾多次，（唔知嗰時係租帶睇定係租 LD 睇架呢？）總之就係係咁回帶，睇佢點整。到睇完咁多年後，好似都無再整過呢個焗飯了。
呢幾日好想食焗豬扒飯，連蕃茄都已經叫外援買埋返屋企，但硬係好似差啲嘢咁。覺得食普通焗豬扒飯好似有啲悶蛋。不如搞搞新意思，整個青咖喱焗飯，不過豬扒如果就咁用醬油醃，又好似唔太特別。所以就整咗個香茅豬扒，加青咖喱汁。諗起有得玩新食譜，好興奮咁走去問老公覺得呢個配搭好唔好。。。點知。。。下刪一百字。
信自己，膽粗粗就走去整！臨入焗爐，我都仲諗緊放唔放芝士好呢？會唔會好古怪呢？不過，我呢個芝士怪，應該就算怪我都會食曬佢啦😄，所以就放咗少少！出嚟效果比我預期中配搭，豬扒仲好嫩添！
以上嘅材料放入攪拌機打碎曬之後，可以醃豬扒，雞扒，或者整爆谷雞都好好味㗎！
煮食 tips：點樣煎豬扒唔會捲起煎唔熟？
豬扒拍鬆咗之後，源住個邊剪入片豬扒裡面大約 5mm - 1cm，特別係有肥肉嘅部分，或者有筋嘅部分。就唔會因為加熱嘅時候縮埋一舊，搞到捲起㗎啦！
煮食 tips：青咖哩太鹹/太淡
青咖喱醬每一個牌子都好唔一樣，有啲特別鹹，有啲特別辣，如果係百佳惠康買嘅玻璃樽裝，一搬都係偏淡味，要落多啲先至有味。 今次我用嘅係上面嗰款青咖喱，係泰國舖買嘅。（灣仔，銅鑼灣，九龍城，西營盤都有）
焗飯配料做法：
想第一時間睇到更多更新，記得 Like 我個 Facebook Page 同 Instagram 啦～
網頁: www.goingback2basics.com/ Facebook： www.fb.com/goinbacktobasics/ Instagram: www.ig.com/back2basicsss/
Youtube: https://bit.ly/2ZK6MyR
Comments